АСТАНА, 27 мамыр – Sputnik. Өскемен қаласының тұрғынын 115 миллион теңгеге алдап кеткен ер адам түрмеден табылды, деп хабарлайды Sputnik Қазақстан Polisia.kz порталына сілтеме жасап.
Полицияға арызданған әйел өз ақшасын 2020 жылдан бері ала алмай жүр. Ал танысы ізім-ғайым жоғалған. Сол кезде ер адам одан бизнес ашу үшін сан алуан сылтаумен ақша сұраған. Алдымен көлікті алып-сатумен айналысатынын айтқан. Одан кейін металл өндіру үшін экскаватор сатып алу қажет деген. Азық-түлік жеткізетін фирманы да ашпақ ниеті барын айтқан. Оған қымбат шетелдік машина сатып алатынын, ең соңында әйгілі брендтердің көшірмелерін сатуға көмектесемін деп уәде берген. Бірақ ақшасын алғаннан кейін ізін жасырған.
Қазіргі кезде залалдың жалпы сомасы 114 миллион теңгеден асып отыр. Полицейлер алаяқтық фактісі бойынша қылмыстық іс қозғады. Күдікті анықталды, ол 39 жастағы Өскемен қаласының тұрғыны болып шықты. Бұрын сотталған және қазір осыған ұқсас қылмыс үшін жазасын өтеп жүр.