АСТАНА, 10 мамыр – Sputnik. Республикалық маңызы бар "Атырау-Астрахань" автожолының құрылысы 2024 жылдың соңына дейін аяқталады, деп хабарлады "ҚазАвтоЖол".
Ресей Федерациясымен шекарада жолдың 616 шақырымынан 833 шақырымына дейінгі учаскеде қайта жаңарту жұмыстары жүргізіліп жатыр.
"Бұл учаскедегі жұмыстар 2018 жылы басталды. Бүгінгі күні 60 шақырым жол аяқталып, қолданысқа берілді. Қазіргі таңда қалған 217 шақырым жолда қайта жаңарту (616 шақырымнан 833 шақырымға дейін) жұмыстары жүріп жатыр", - делінген хабарламада.
Биыл су тасқынына қарамастан, мердігер компаниялар ауа райының қолайлығына байланысты құрылыс жұмыстарына кірісіп кетті.
Қазіргі уақытта жобаға 400-ге жуық арнайы жөндеу-құрылыс техникасы мен 650 аса жұмысшылар жұмылдырылды.
Былтыр 616-833 шақырым аралығындағы учаскеде ұзындығы 210 шақырым болатын көлемі 3,7 млн. м3 жол төсемінің құрылысы аяқталды. Сондай-ақ 187,5 шақырым аралықта негізгі қабат және 187 шақырымда ірі асфальтобетон тастардан төменгі қабаты төселді.
Осылайша, 187 шақырым аралықта қауіпсіз әрі қолайлы қозғалыс үшін жаңа асфальтобетон жол төселді.
2024 жылдың басынан бері 22 мың тоннадан астам асфальтобетон төселіп, ол 9 шақырым жолды құрады.
"Бұл аймақта инертті материалдардың тапшылығына байланысты жобадағы қайта жаңару жұмыстары ұзақ уақытқа созылуда. Жолды соғуға қажетті қиыршық тастар құрылыс нысанына 1000 шақырымнан астам жерде орналасқан Мұғалжар және Біршоғыр стансаларынан теміржол арқылы жеткізіледі", - деп түсіндірді "ҚазАвтоЖол".
Бұрын бұл учаске арқылы жол жүру ұзақтығы 5 сағат болса, қазір бүкіл жолды 2 сағаттың ішінде жүріп өтуге болады.
2024 жылдың соңына дейін жоба жұмыстарын аяқтау жоспарланып отыр.
Жоба халықаралық стандарттарға сәйкес болу үшін жергілікті компаниялармен қатар, Италия, Түркия және Әзербайжан елдерінің компаниялары да тартылған.