АСТАНА, 16 сәуір – Sputnik. Кейінгі 10 жылдың ішінде 2,5 мыңнан астам ағзаны трансплантациялау операциясы жасалды. Бұл туралы Астана қаласында өткен "Қазақстандағы этикалық донорлық" семинарында айтылды, деп хабарлады Денсаулық сақтау министрлігінің баспасөз қызметі.
Қазіргі уақытта елде 7 трансплантация орталығы, 40 донорлық ұйым жұмыс істейді, олар қайтыс болғаннан кейін донорды трансплантаттау мақсатында көп ағзаны алуға дайындау бойынша медициналық қызмет көрсетеді.
Ведомствоның мәліметінше, кейінгі 10 жылдың ішінде Қазақстанда 2,5 мыңнан астам ағзаны трансплантациялау операциясы жасалды, бұл ретте ағза 83% жағдайда тірі кезіндегі донордан, 17% жағдайда қайтыс болғаннан кейінгі донордан алынған.
"Бүгінгі таңда донорлар мен реципиенттердің бірыңғай тізілімінде 4000-ға жуық адам, оның ішінде 104 бала ағзаны трансплантаттауды күтіп жүр, олардың көпшілігі жас және еңбекке қабілетті жастағы адамдар. Реципиенттердің ішінде 3735 адамға бүйрек, 185 адамға бауыр, 144 адамға жүрек, 16 адамға өкпе трансплантаттау қажет", - делінген хабарламада.
Бүгінгі таңда Қазақстанның 6000-ға жуық азаматы қайтыс болғаннан кейін ағзалардың донорлығына келісім білдірді.
Айта кетері, әлемде жыл сайын 115 мыңнан астам ағзаны трансплантациялау отасы жүргізіледі. АҚШ, Испания, Хорватия, Иран сияқты елдерде ауыстырылып қондырылған ағзалардың кем дегенде 85%-ы қайтыс болғаннан кейінгі донорлардан алынған.