АСТАНА, 11 наурыз – Sputnik. Қарулы күштердің жауынгерлік дайындығы бағдарламасы аясында 11-19 наурыз аралығында Қарағанды облысының аумағында екіжақты командалық-штабтық оқу-жаттығу өтеді, деп хабарлайды қорғаныс министрлігі.
"Жауынгерлік дайындық шаралары кезінде Қарағанды, Алматы, Жетісу облыстарының аумағында күштер мен құралдардың қозғалысы жүзеге асады. Оқу-жауынгерлік міндеттерді пысықтау мақсатында бөлімшелер полигондарға темір жол, әуе және автомобиль көлігі арқылы аралас тәсілмен марш жасайды. Кейін тұрақты орналасу пункттеріне оралады", - делінген хабарламада.
Осы кезеңде өңірдің жекелеген аудандарында шектеу шаралары енгізілуі мүмкін, деп ескертті ведомство.
Осыған байланысты қорғаныс министрлігі азаматтардан оқу-жаттығуға түсіністікпен қарауды және тыныштық сақтауды сұрады.
Сондай-ақ әлеуметтік желіде әскери техниканың қозғалысы туралы жалған хабарламалар мен бейнематериалдар таратпауды өтінді. Қолданыстағы заңнамада жалған ақпарат таратқаны үшін қылмыстық жауапкершілік қарастырылған, деп атап өтті министрліктегілер.