АЛМАТЫ, 8 ақпан – Sputnik. Қатты желдің салдарынан Астана әуежайында он бес рейс тоқтатылды, тағы 18 рейс кешіктірілді, деп хабарлады компанияның баспасөз қызметі.
"Астана әуежайының әуеайлағында 19 м/с жылдамдықпен және екпіні 23 м/с дейін қатты жел соғып тұр, бұл ұшақтардың ұшуы мен қонуы кезінде қиындықтар туғызуы мүмкін. Сондықтан авиакомпаниялар жолаушылар мен экипаждардың қауіпсіздігін қамтамасыз ету үшін шаралар қабылдап жатыр. Жоспарланған 72 рейстің ұшатын 7 рейсі, ұшып келетін 8 рейсі тоқтатылды. Сонымен қатар ұшатын 6 рейс, ал ұшып келетін 12 рейс кешіктіріледі", - делінген хабарламада.
Жолаушыларға рейстерінің мәртебесі және кестедегі ықтимал өзгерістер туралы ақпарат алу үшін авиакомпаниялармен байланысу керек.
Аэродромды қалың қардан тазарту жұмыстары үздіксіз жүріп жатыр. Бұған 23 бірлік арнайы техника жұмылдырылды.