АСТАНА, 15 желтоқсан – Sputnik. Кентау қаласында қолайсыз ауа райы салдарынан орын алған жағдайларды қалпына келтіру бойынша жұмыстар үздіксіз жүргізілуде, деп хабарлайды Түркістан облысы әкімдігінің баспасөз қызметі.
Кентау қаласына арнайы барған облыс әкімі Дархан Сатыбалды штабтың шұғыл отырысын өткізіп, барлық құрылым басшыларына орын алған жағдайлардың салдарын жоюға байланысты тікелей тапсырмалар берді. Қазіргі таңда ЖЭО-5 орталығында қазандықтар жұмыс істеп тұр.
"Қала бойынша 6 көпқабатты тұрғын үй мен 40-қа жуық жеке сектордағы үйлердің жылу жүйелерінде ақау орын алған. Қалыпқа келтіру бойынша 11 бригада мен арнайы техникалар жұмылдырылып, жұмыстар атқарылуда. Қаладағы ауыз су мәселесі 100 пайыз шешімін тауып, ретке келтірілді", - делінген хабарламада.
Дауылды желдің салдарынан қаладағы 6 көпқабатты тұрғын үй мен 37-ге жуық жеке сектордағы тұрғын үйлердің жарығын қосу бойынша жұмыстар атқарылып жатыр. Сонымен қатар залал келтірілген нысандар қалпына келтіріледі.
Кентау қаласында қолайсыз ауа-райы салдарынан орын алған жағдайларды қалпына келтіру бойынша жұмыстар үздіксіз жүргізілуде
© Түркістан облысының әкімдігі
Барлық секторлар бойынша жұмыстарды жүргізуге 200-ден аса қызметкер мен 15 техника жұмылдырылды.
Еске сала кетейік, кеше қатты жел салдарынан №1 насос станциясы істен шықты. ЖЭО жұмысы 10 минутта қалпына келтірілді. Қазіргі уақытта төрт қазандық қалыпты жұмыс істеп тұр.