АСТАНА, 10 желтоқсан – Sputnik. Алматыда Алмалы ауданында ақылы тротуар тұрақтары іске қосылады, деп хабарлайды қалалық әкімдіктің баспасөз қызметі.
11 желтоқсаннан бастап Алматы қаласының Алмалы ауданында ақылы тротуар тұрағы минутына ақы алады. Бұл ауданда 27 аймақ, 6504 тұрақ орны жұмыс істейді, оның ішінде 454-і – мүмкіндігі шектеулі адамдар үшін.
Ақылы тротуар тұрағының жұмыс уақыты: күн сайын сағат 8: 00-ден 19:00-ге дейін. Бір сағаттың құны - 100 теңге. Уақытты есептеу көлік құралының тұрақ аймағында тоқтаған сәтінен басталады. Тұрақ ақысын алғашқы 15 минут ішінде төлеу қажет.
Тротуар үлгісіндегі тұрақтар басқа аудандарда кезең-кезеңімен іске қосылады.
Бұзушылықтар автоматты режимде, мобильді кешендер арқылы (арнайы авто) тіркеледі. Ақылы тұрақ үшін төлеуден жалтарғаны үшін айыппұл 3 АЕК-ті құрайды (ҚР 597-бабы, 4-1-б.). Бір жыл ішінде тағы қайталанатын болса, 5 АЕК мөлшерінде айыппұл салынады.