АЛМАТЫ, 23 қараша – Sputnik. Жамбыл облысы Сарысу ауданы Жаңатас қаласында тұрғындарға химиялық кәсіпорынның санитарлық аймағында жер телімдері берілмек болған, деп хабарлайды облыстық прокуратураның баспасөз қызметі.
Прокурорлар Жаңатас қаласының даму жоспарының заңдылығын тексерді.
"2018 жылы қала дамуының жоспарлау жобасына жеке тұрғын үй құрылысына арналған 61 жер учаскесін беру бойынша өзгертулер енгізілген. Жоспарлау жобасын әзірлеу барысында санитария, төтенше жағдай және экология саласындағы уәкілетті органдардың келісімі алынбаған", - дейді ведомство.
Салдарынан жер учаскелері мұнай өнімдерін өңдейтін кәсіпорынның санитарлық-қорғау аймағына кіріп кеткен.
"Азаматтардың құқықтары мен денсаулығын қорғау мақсатында аудандық мәслихаттың 8 қарашадағы шешімімен Жаңатас қаласының жоспарлау жобасына енгізілген өзгерістер бұзылды. Қазіргі уақытта жергілікті атқарушы орган басқа жер учаскелерін беру бойынша жұмыс істеп жатыр", - дейді прокуратура.