АСТАНА, 28 қазан – Sputnik. Мұнай өңдеу зауыттарынан жүк тасымалдау бойынша барлық сұраныс 100% қамтамасыз етіліп жатыр, тиеу станцияларына жақын аумақтардағы цистерналарда үш тәулікке жететін қор бар, деп хабарлады "Қазақстан темір жолы" ҰК" АҚ баспасөз қызметі.
"Қазан айында 122,6 мың тонна сұйытылған табиғи газ және 616,8 мың тонна бензин мен дизель отыны тиеліп, жоспар 100 пайызға орындалды", - делінген хабарламада.
Сондай-ақ ұлттық компания газ және мұнай өнімдерін тасымалдау жөніндегі штаб тәулік бойы жұмыс істейтінін, вагондардың қозғалысы ерекше бақылауда екенін атап өтті.
Компания тұтынушыларға "тауарларды жеткізудің нормаға сай мерзімін" және жүкті түсіру нүктелеріне вагондарды жедел жеткізуді қамтамасыз етеді.
ҚТЖ баспасөз қызметі жеткізудегі проблемаларға әкімдіктерден өтініштердің уақтылы жолдануы, сондай-ақ мұнай өңдеу зауыттарынан жүк тиеудің ақысын төлеу және бөлу әсер ететінін мәлімдеді.