АЛМАТЫ, 15 қазан - Sputnik. 2030 жылға қарай инфрақұрылымды, шағын және орта бизнесті дамыту, көлеңкелі экономиканы айтарлықтай қысқарту және Транскаспий халықаралық көлік бағытын дамыту есебінен жалпы ішкі өнім көлемі екі есе артатын болады, деп мәлімдеді Ұлттық экономика министрі Әлібек Қуантыров.
Ол бұл сөзін Марракеште (Марокко) Дүниежүзілік Банктің швейцариялық кіші тобы құрылтайшыларының жиналысында айтты.
Бұл туралы ведомствоның баспасөз қызметі хабарлады.
"Жергілікті өзін - өзі басқару органдарына бюджет пен кірістер бойынша кең өкілеттіктер беріледі", - деді министр.
Сонымен қатар ел билігі биыл экономикалық өсу қарқынын 5% деңгейінде ұстауды жоспарлап отыр.
Бұған дейін 2023 жылдың қаңтар - маусым айларында жалпы ішкі өнім 2022 жылдың сәйкес кезеңімен салыстырғанда нақты мәнде 5,3%-ке өскені хабарланған болатын.