Діндер съезі 20 жыл ішінде өркениетаралық диалог алаңына айналды – Тоқаев

Мемлекет басшысы Әлемдік және дәстүрлі діндер көшбасшылары съезі хатшылығының ХХІ отырысына қатысушыларға үндеу жолдады
Sputnik
АСТАНА, 11 қазан - Sputnik. Қасым-Жомарт Тоқаев жиынға қатысушыларды Әлемдік және дәстүрлі діндер көшбасшылары съезі хатшылығының ХХІ отырысының ашылуымен құттықтады, деп хабарлайды Ақорда.
Президент биыл алғашқы съездің шақырылғанына 20 жыл толғанын атап өтті. Осы уақыт ішінде форум өзінің өміршеңдігін дәлелдеді.
"Аз уақыт ішінде маңызды өркениетаралық диалог алаңына айналды. Форум дінаралық татулық пен келісімді нығайтуға, бүкіл адамзатқа ортақ түйткілдердің шешімін табуға және толеранттылықты дәріптеуге септігін тигізіп келеді", - деді мемлекет басшысы.
Ол басқосу аясында әлемнің рухани көшбасшылары жаһан жұртын алаңдатқан өзекті мәселелерді талқылап, бейбітшілікті сақтау және өзара құрмет пен сыйластықты насихаттау туралы ойларын ортаға салатынын айтты.
Президент әлем халқын бейбітшілікке шақыратын жаңа жаһандық қозғалыс қажет екенін жеткізді.
Сонымен қатар Қасым-Жомарт Тоқаев Қазақстан дінаралық және өркениетаралық ынтымақтастыққа негіз болатын бастамаларға әрдайым қолдау көрсететінін, оны сыртқы саясаттың негізгі басымдықтарының бірі ретінде ұстанатынын атап өтті.
Астанада Әлемдік және дәстүрлі діндер көшбасшылары съезі хатшылығының отырысы өтіп жатыр