АСТАНА, 11 қазан – Sputnik. Мәжіліс депутаты Ерлан Сайыров энергетика министрінен осы қыста өңірлерде "Екібастұз апаты" қайталанбай ма деп сұрады.
Мәжілісменнің айтуынша, әріптестері жуырда Теміртаудағы ЖЭО мен Қарағандыдағы жылу желілерін барып көріп шыққан. Жұмсартып айтқанда, жағдай көңіл көншітпейді.
"АрселорМиттал Теміртау" АҚ ЖЭО-2-де жылу қазандықтары тозған. 4-ші қазандықты жөндеу қазан айының соңына дейін ұзартылған. 7-ші жаңа қазандықтың құрылысы келесі жылдың соңына дейін созылған. Теміртау ЖЭО-да төрт қазандықтың жабдығы келмеген, жөндеу жұмыстары кешіктіріліп жатыр. Жылу беру маусымына жоспардан кеш кіру қаупі бар. Жылыту маусымы әлі басталған жоқ, ал біз апаттарға куә болып отырмыз. Қарағанды ЖЭО-3-тегі апат бүкіл қаланы жарықсыз қалдырды", - дейді Сайыров.
Ол осы қыста халық жылусыз қала ма деп алаңдайды.
"Осы қарқынмен қыста "Екібастұз апаты" қайталанбай ма? Сіз ЖЭО проблемасын саясиландыруға жол бердіңіз, алдағы жылу беру маусымында жеке жауапкершілігіңізді сезінесіз бе?" деп сұрады депутат энергетика министрінен.
Алмасадам Сәтқалиев жылу беру маусымы бойынша үлкен жұмыс атқарылғанын атап өтті. Барлығы 55 млрд теңгеге жуық қаражат бөлінген, оның 37,1 млрд теңгесі жылу-энергетика нысандарына бағытталған.
"Қарағанды энерготорабы бойынша белгілі бір проблемалар бар. Біз "АрселорМиттал Теміртау" ЖЭО-2-ні проблемалық нысанға жатқызамыз. Төрт қазандық, екі турбина жұмыс істеп тұр. Төртінші қазандық бойынша жұмыс кешігіп жатыр, 30 қарашада аяқталады деп күтілуде. Жалпы бұл жылу жүктемесіне қатты әсер етпейді. Осы ЖЭО бойынша жылу беру маусымы 30 қырүйекте басталды. Тұтынушылардың 80 пайызы қосылды", - деді Сәтқалиев.
Министр кешігулерге байланысты проблемалар министрлік пен жергілікті атқарушы билік тарапынан бақыланатынын атап өтті.
"Иә, жеке жауапкершілігімді сезінемін. Барлық мәселе бойынша депутаттар алдында да, халық алдында да жауап беруге дайынбыз", - деді ведомство басшысы.