АЛМАТЫ, 25 қыркүйек - Sputnik. Алматы облысы Еңбекшіқазақ ауданы Сарыбұлақ ауылында 200-ден астам оқушы жатақханада оқып жатыр. Ауыл халқының базынасын Sputnik Қазақстан тілшісі біліп қайтты.
Сарыбұлақ ауылы Алматыдан 120 шақырым жерде орналасқан. Бұл ауылда ең алғашқы мектеп 1931 жылы бастауыш мектеп ретінде ашылған. Содан бері сарыбұлақтық оқушылар спорт залы жоқ мектепте білім алып келе жатыр.
"Мектеп ғимараты болған емес. Қай жер бос қалады сол жерді мектеп етіп жасайды. Дене шынықтыру сабағын далада немесе кабинетте оқытады. Балаларымызға обал. Бір де бір рет мектеп ғимараты болмау деген сұмдық қой", - дейді ауыл тұрғыны Дәмеш Мақажанова.
Сарыбұлақ ауылының 2000-ға жуық тұрғыны бар. Бұл мектепке 200-ден астам оқушы барады.
Алматы облысында 200-ден астам оқушы жатақханада оқып жатыр
© Айдана Дайырова
Қазір оқушылар бір ғасырлық көне мектеп пен жатақхана ғимаратында және Кеңес үкіметі құлағанда қаңырап қалған кеңсені паналап қотыр. Не акт залы, не спорт залы жоқ. Жатақхана ғимаратының салынғанына да 72 жыл болған.
"Мектеп суық. Қыс бойы балаларымыз ауырып шығады", - дейді ауыл тұрғындары.
Мектепке арналған үш ғимаратты жылытатын қазандық орнатылған ғимараттың да жағдайы мүшкіл.
"Ғимараттар өте ескі, терезелері шіріп тұр. Жылыту қазандығы алыс орнатылған. Бірақ ғимарат әбден тозғандықтан жылуды ұстамайды", - дейді мектеп әкімшілігі.
Мектепте қандай да бір шара не далада, не кеңдеу бір кабинетте өтеді. Жатақхана-мектептің шатыры да әбден тозған. Жауын жауса, оқушылардың төбесінен су сорғалайды. Төбедегі саз балшық езіліп түсіп, еденге құлап жатады.
Алматы облысында 200-ден астам оқушы жатақханада оқып жатыр
© Айдана Дайырова
Абырой болғанда, мектеп түлектері ескі ғимараттың сыртқы кіреберіс есігін орнатып беріпті.
Оқушылар ыстық тамақтан да қағылған. Өйткені жағдай жоқ. Ал электр желілері туралы айтудың өзі артық, тозығы жетіп шіріген.
"Бізге қашан мектеп салынатынын білмейміз. 2023 жылы жаңа мектеп салынады деп айтқан, бірақ сол күйі үнсіз қалды. Қолдан келгеннің бәрін жасап жатырмыз. Білім беру бір күн де тоқтаған емес", - дейді Сарыбұлақ орта мектебінің директоры Мадина Асқарова.
Алматы облысында 200-ден астам оқушы жатақханада оқып жатыр
© Айдана Дайырова
Мектептің проблемасы көтерілгенде, аудандық санитарлық-эпидемиологиялық қадағалау мамандары дереу келіп, 226 мыңайыппұл салған.
Десе де, мектебі жоқ ауылда биыл 16 түлектің 11-і грантты ұтып алған. Спорт залы жоқ сарыбұлақтық оқушылар түрлі спорт жарыстарынан алдарына жан салмай, жүлделі орындар алып келеді.
Алматы облысында 200-ден астам оқушы жатақханада оқып жатыр
© Айдана Дайырова