АСТАНА, 24 шілде – Sputnik. Астана қаласының бас мемлекеттік санитариялық дәрігері Сархат Бейсенова қаладағы субұрқақтардан алынған сынаманың нәтижесін жариялады, деп хабарлайды Sputnik Қазақстан.
Биыл зертханада субұрқақтардан алынған судың сынамасы зерделенді. Соның нәтижесінде маусым айында санитарлық-химиялық және микробиологиялық талаптарға сай келмейтін төрт сынама анықталды. Жергілікті атқарушы органдарға хабарлама жіберілді. Ал субұрқақтарға жауапты мекемелер тазалау жұмыстарына кірісті.
Бас санитардың айтуынша, субұрқақтарда шомылуға болмайды. Себебі энтеравирус инфекциялары, яғни ішек инфекциялары жылы судың бетінде көбейеді.
"Жазда рұқсат етілген жерлерде, сосын бассейнде суға түсуге болады. Ал фонтандарда шомылуға болмайды. Бізде мамыр айынан бастап энтеравирус инфекциялары көп тіркеледі. Содан маусым-шілде айларында ол инфекцияларға шалдыққан адамдар көбейеді", - деп атап өтті Бейсенова.
Энтеравирус инфекциясынан бөлек ішек инфекциялары, дизентерия мен А гепатитін жұқтыру қаупі жоғары. Биыл екі адам рұқсат етілмеген жерде шомылғаннан кейін сірлі менингитпен ауырып қалған.