АСТАНА, 26 маусым – Sputnik. Қазақстан мұсылмандары діни басқармасы "блогер қыз-келіншектер ақша үшін орана бастады" деген қауесетке қатысты түсініктеме берді, деп хабарлайды Sputnik Қазақстан тілшісі.
Орталық коммуникациялар қызметінде өткен баспасөз мәслихатында журналистер "блогерлер хиджаб кигені үшін ақы алады екен" деген әңгіменің қаншалықты шындыққа жанасатынын сұрады.
Мүфтият өкілі бұдан бейхабар екенін айтты.
"Орамал тарту балиғатқа жеткен әйел баласына парыз болғандықтан, бір нәрсені жарнамалау немесе басқа ретінде ақша төлеп, орамал тартқызды деген әңгімені біз естіген жоқпыз. Әр мұсылманның, яғни әйел баласының орамал тартуы өзінің шын ықылас-ниетімен болатын нәрсе. Өйткені ол парыз деп айтылған", - деп жауап берді ҚМДБ төрағасының кеңесшісі Кенжетай Дүйсенбай.
Осы орайда ол дәлелі жоқ ақпаратты таратпауға кеңес берді.
"Өзіңіз рас-өтірігін білмеймін деп қалдыңыз. Сондықтан бұл жаңсақ пікірлерді шама келсе, мұндай мәселелерге кірмеген дұрыс. Өйткені бұл дәлелденбеген нәрсе болғандықтан, шариғатымызда да, қазақтың әдет-ғұрпында да естіген әңгімені айтуға және таратуға болмайды", - деді Кенжетай Дүйсенбай.
Бұған дейін танымал тележүргізуші Динара Сәтжан дәстүрлі қазақ исламын жақтайтынын айтып, блогерлерге оранғаны үшін ақша ұсынылғанын естігенін жазды. "Мені осы нәрсе шошытады" дейді журналист.