АСТАНА, 22 маусым – Sputnik. Қазақстан өңірлерінде 18 оқу орны мен 69 көше жаңа атауға ие болады. Бұл туралы мәдениет және спорт министрі Асхат Ораловтың төрағалығымен өткен республикалық ономастика комиссиясының отырысында белгілі болды.
Жиында өңірлердегі 18 оқу орнын және Көкшетау, Қосшы, Степногор (Ақмола облысы), Арыс (Түркістан облысы) және Талдықорған (Жетісу облысы) қалаларындағы 69 көшені қайта атау мәселесі талқыланды.
"Жақында Түркістанда өткен Ұлттық құрылтайда президент өмірбаяны біреудің жеке мүддесі мен қалауы үшін мақсатты түрде мифологияланған кеңестік кезеңдегі қайраткерлердің есімдерін әртүрлі нысандарға беру тәжірибесін тоқтату керектігін айтты. Мемлекет басшысы ономастика саласында тәртіп орнатуды және өңірлік ерекшеліктерді, жалпыұлттық басымдықтарды ескеріп, барлық рәсімді регламенттеуді тапсырды. Дәл осы мақсатта министрлік көрнекті қайраткерлер мен тарихи тұлғалардың "Тарихи тұлғалар" тізімін өзектендіру бойынша жұмыс жүргізуде, соның негізінде нысандар мен көшелерге жаңа атаулар беріледі",- деді Оралов.
Отырыс қорытындысы бойынша Оңтүстік Қазақстан педагогика университетіне көрнекті мемлекет және қоғам қайраткері, ғалым-этнограф, тарихшы, академик Өзбекәлі Жәнібековтің есімін беру туралы шешім қабылданды.
Ақтау қаласындағы №28 жалпы білім беретін мектепке ұлы ағартушы, ғалым, ақын және публицист Ахмет Байтұрсынұлының есімі берілді. "Ұлт ұстазының" есімімен Қостанай ауданы білім бөлімінің мемлекеттік тілде оқытатын Заречная жалпы білім беретін мектебі, сондай-ақ Жетісу облысы Алакөл ауданы Үшарал қаласының №1 орта мектебі аталады. Жетісу облысы Алакөл ауданы Бескөл станциясының № 14 орта мектебі әлемге әйгілі қазақ жазушысы Мұхтар Әуезовтің құрметіне өзгертіледі.
Түркістан облысының Арыс қаласында Роза Бағланованың, Қазақстанның Халық жазушысы Шерхан Мұртазаның және әртүрлі географиялық орындардың: Шарын, Сарыарқа, Ұлытау, Жидебай, Сарайшық және т. б. атындағы көшелер пайда болады.
Сондай-ақ "Гүлдер", "Асу", "Тіршілік" және "Айналайын" сынды атаулардың бір бөлігі қайта қарауға бағытталды. Отырысқа қатысушылар көше атаулары өңірдің тарихи және географиялық ерекшеліктерін көрсетіп, нақты мағынаға ие болуы керек деген пікірге келді.
Қазіргі уақытта комиссияға 681 ұсыныс түсті. Оларды жергілікті ономастикалық комиссиялардың қарауына әкімдіктерге жіберу туралы шешім қабылданды. Мәдениет комитетіне әдістемелік ұсынымдарға қажетті өзгерістер енгізу жөнінде тапсырмалар беріледі.