АСТАНА, 12 маусым – Sputnik. Түркістан облысында күдікті ер адам уақытша ұстау изоляторынан қашып кетті. Полиция "Құрықтау" жоспарын жариялады.
Оқиға кеше, 11 маусымда болған.
Қылмыстық кодекстің 188-бабы бойынша ұрлық жасады деген күдікке ілінген ер адам Сарыағаш аудандық полиция бөлімінің уақытша ұстау изоляторынан қашып кеткен.
"Оқиға орнына тез арада жедел-тергеу тобы шықты. Қазір жан-жақты жедел-іздестіру шаралары жүргізіліп жатыр. Іздеуге Түркістан облысы полиция департаментінің барлық жеке құрамы жұмылдырылған", - деп хабарлайды ІІМ баспасөз қызметі.
Тәртіп сақшылары "Құрықтау" жоспарын жариялады. Сарыағаш қаласы мен облыстың кіреберісі мен шыға берісіне бекеттер қойылды.
Сондай-ақ ұстау шараларына Түркістан облысымен көршілес Шымкент қаласының, Жамбыл, Алматы және Қызылорда облыстарының полициясы, көліктегі полиция бөлімдері мен ҰҚК Шекара қызметі де жұмылдырылды.