Алматыда Бердібек Сапарбаевты ақтық сапарға шығарып салды – фото

АСТАНА, 11 маусым – Sputnik. Алматыда мемлекет және қоғам қайраткері Бердібек Сапарбаевпен қоштасу рәсімі өтті. Шараға премьер-министр Әлихан Смайылов та қатысты.

Бердібек Сапарбаевпен қоштасу рәсімі Алматы қаласында Абай атындағы Қазақ ұлттық опера және балет театрында өтіп жатыр. Белгілі отандасымен қоштасуға мемлекет және қоғам қайраткерлері, үкімет мүшелері, облыс әкімдері, парламент депутаттары, мәдениет, спорт және басқа да салалардың өкілдері келді.

Қоштасу рәсімінде сөз сөйлеген Әлихан Смайылов Қазақстан президенті Қасым-Жомарт Тоқаевтың көңіл айту хатын оқыды.

"Көрнекті мемлекет және қоғам қайраткері Бердібек Машбекұлы Сапарбаевтың дүниеден өтуіне байланысты қайғыра көңіл айтамын. Бердібек Машбекұлы ұзақ жылғы еселі еңбек жолында лауазымды қызметтерді абыройлы атқарып, еліміздің саяси-экономикалық, әлеуметтік-мәдени өркендеуіне және өңірлерді дамытуға мол үлес қосқан еді. Мемлекетіміздің сындарлы саясатын үлкен біліктілікпен жүргізе біліп, Қазақстанның беделі мен мәртебесінің арта түсіне қажыр-қайратын жұмсады. Азаматтық қадір-қасиетімен ел ішінде құрметке бөленді. Соңына өшпес із қалдырған Бердібек Машбекұлының есімі мен жарқын бейнесі халқымыздың жүрегінде мәңгі сақталады. Марқұмның иманы саламат, жаны жәннатта болсын", — делінген мемлекет басшысының көңіл айту хатында.

Премьер-министр де үкімет мүшелері және өзінің атынан көңіл айтты.

Саяси қызметтерде жүрген кезінде Бердібек Сапарбаев республиканың бірқатар өңірін басқарды – Ақтөбе, Шығыс Қазақстан, Қызылорда, Оңтүстік Қазақстан және Жамбыл облыстарының әкімі болды. Сонымен қатар ол екі рет еңбек және халықты әлеуметтік қорғау министрі, премьер-министрдің орынбасары болып тағайындалған.