АЛМАТЫ, 16 мамыр – Sputnik. 27 жастағы такси жүргізушісі ресейлікті Алматы әуежайынан қаланың Марков көшесінде орналасқан мекенжайға дейін жеткізіп тастағаны үшін 400 еуро (шамамен 200 мың теңге) алған, деп хабарлайды Sputnik Қазақстан көліктегі полиция департаментіне сілтеме жасап.
Осы жылдың 3 мамырында сағат 17.00-де Алматы қаласының әуежайындағы желілік полиция бөлімінің кезекші бөліміне Ресей Федерациясының 30 жастағы азаматы арызданып, Алматы қаласы әуежайының такси жүргізушісіне қатысты шара қабылдауды сұраған. Такси жүргізушісі ресейлік азаматты қаланың Марков көшесінде орналасқан мекенжайға жеткізіп тастап, сол қызметі үшін 400 еуро алған.
Жедел-іздестіру іс-шаралары барысында арыз берушіні діттеген жеріне жеткізіп тастаған "Мерседес-Бенц" автокөлігі мен оның иесі анықталды. Ол 27 жастағы Алматы облысының тұрғыны болып шықты.
Жауап алу кезінде ер адам өзінің кінәсін мойындап, ресейлік азаматқа ақшалай қаражатты толық көлемде қайтарып берді.
Осы факт бойынша құқық бұзушыға қатысты ҚР ӘҚБтК-нің 449-бабы 2-тармағы бойынша әкімшілік хаттама толтырылды.
Алматы қаласының мамандандырылған әкімшілік сотының шешімімен ер азаматқа 21 150 теңге көлемінде айыппұл салынды.