АЛМАТЫ, 12 наурыз – Sputnik. Шығыс Қазақстан облысында су тасқыны болуы мүмкін деген жерлерге әуеден барлау жұмысы жүргізілді, деп хабарлайды облыстық төтенше жағдайлар департаментінің баспасөз қызметі.
Риддер қаласы, Алтай, Глубокое, Катонқарағай, Күршім, Самар, Ұлан аудандарындағы өзен арналары, таулы және жазық аумақтар, гидротехникалық құрылыстар тексерілді.
Тікұшақпен әуеден барлау жүргізілді
© Photo : МЧС Казахстана
"Алтай ауданындағы Бұқтырма өзенінің су тасқыны қаупі бар учаскелерінде мұзды ұсақтау бойынша жарылыс жұмыстарын жүргізу барысы тексерілді. Жазықтықта, Күршім ауданында қар 60-70%-ға, Самара және Ұлан аудандарында 20-40%-ға еріген. Қалған жазық аумақта қар жылдам еріп жатыр. Су тасқыны жағдайын үнемі бақылауда ұстап отырмыз", - деді Шығыс Қазақстан облысы әкімінің орынбасары Ержан Нұрбаев.
ШҚО ТЖД бастығының орынбасары Арман Тоқановтың айтуынша, зерттелген аумақта өзендердің арнасынан асуы және су тасқыны анықталған жоқ.
Су тасқыны қаупі бар аймақтарға әуеден барлау жүргізілді
© Photo : МЧС Казахстана
"Бұқтырма, Үлбі ірі өзендерінің арналары мен су қоймаларында мұз қатып жатыр. Қалжыр өзенінің арнасы мұздан енді ғана ашыла бастады. Тексерілген гидротехникалық құрылыстарда жағдай тұрақты, 30-60% суға толған. Су деңгейі төмендетілген, төменгі су ағыны ашық. Облыстың барлық таулы аумағын қар басып жатыр", - деді Тоқанов.
Облыста су тасқыны болған жағдайда 1 719 адам, 756 бірлік техника, 83 бірлік жүзу құралы және 224 мотопомпа дайын, дейді ведомство. Қажет болған жағдайда әскери бөлімнің күштері мен құралдары да жұмылдырылады.