АСТАНА, 28 ақпан — Sputnik. Премьер-министрдің орынбасары - сыртқы істер министрі Мұхтар Тілеуберді Ресей жақтан қауіп жоқ екенін мәлімдеді, деп хабарлайды Sputnik Қазақстан тілшісі.
Бүгін Орталық Азия елдері мен АҚШ сыртқы істер министрлерінің "С5+1" форматындағы кездесуінен кейінгі брифингте америкалық журналистер Украинадағы жағдайға байланысты аймақтағы қауіп-қатерлер туралы сұрады.
"Министр мырза, сіз Украина мен Ресеймен тарихи байланыстар туралы айттыңыз. Ал Украинадағы жағдайдан кейін экономикалық тұрғыда және қауіпсіздік жағынан қандай да бір қауіп сезілмей ме?", - деді тілшілер.
Тілеуберді Ресеймен бірнеше халықаралық ұйым аясында өзара байланыс жүргізіп жатқанын жеткізді. Негізгі мақсат - экономикалық әріптестік.
""Қазақстан өз жерін қандай бір басып кіру мен санкциялар үшін пайдалануға жол бермейді. Біз Ресей жақтан қандай да бір қауіпті немесе қатерді сезіп отырған жоқпыз. Ресей мен Қазақстанның арасында шекара толығымен бекітілді. Бұл - жермен өтетін ең ұзын шекара. Бүгінде 7,5 мың шақырым шекараның 70 процентіне белгі қойылды", - деп атап көрсетті Тілеуберді.
Министр Қазақстанның көпвекторлы сыртқы саясатын жалғастыра беретінін ерекше атап өтті. Осылайша, әлемнің барлық елімен өзара тиімді ынтымақтастық пен байланыс сақтауға мүмкіндік бар.