АСТАНА, 23 ақпан – Sputnik. Қазақстанның Азаматтық авиация комитеті жолаушыларға қызмет көрсету талаптарын бұзғаны үшін "Air Arabia" әуе компаниясын әкімшілік жауапқа тартты.
Комитеттің ақпаратынша, "Air Arabia" компаниясы Алматы – Шарджа бағыты бойынша рейс кешіктірілген кезде жолаушыларға алкогольсіз сусын беруден бас тартқан. Осылайша Қазақстанның қолданыстағы заңнамасында көрсетілген жолаушыларға қызмет көрсету талаптарын бұзған.
"Осыған байланысты 13 ақпанда "Air Arabia" әуе компаниясы Әкімшілік құқықбұзушылық туралы кодекстің 567-бабын бұзғаны үшін 200 АЕК (690 мың теңге) мөлшерінде айыппұл төлеу түрінде әкімшілік жауапкершілікке тартылды", - делінген хабарламада.
Азаматтық авиация комитеті қазақстандық және шетелдік әуе тасымалдаушыларын рейс кешіккен жағдайда жолаушыларға қызмет көрсету талаптарын бұзғаны үшін жауапкершілікке тарту бойынша жұмыс жалғасатынын атап өтті.