АСТАНА, 20 ақпан – Sputnik. Алматы әуежайында Моңғол империясы тұсында соғылған көне монеталарды Қазақстаннан АҚШ-қа заңсыз әкету фактісінің жолы кесілді.
Көне монеталарды елден әкетпек болған адамды Алматы мемлекеттік кірістер департаментінің "Жетісу" кеден бекеті ұстады.
Монеталар құжаттарға арналған қаптама пакетке жасырылған. Кеден қызметкерлері оларды рентген қондырғының көмегімен пакетті сканерлеу барысында анықтады.
Алматының кеден бекеті тапқан көне монеталар
Алматы мемлекеттік кірістер департаментінің ақпаратынша, монеталар болжам бойынша V-XIII ғасыр аралығында Орта Азия аумағында соғылған және тарихи құндылыққа ие.
Департамент басшысының орынбасары Дәурен Мұстафиннің айтуынша, табылған заттар мәдени және тарихи құндылықтар санатына жатады, оларды Қазақстан заңнамасына сәйкес міндетті декларациялау және уәкілетті органның рұқсаты болған жағдайда ғана елден әкетуге болады.
"Қазіргі уақытта анықталған факт бойынша тәркіленген заттар мен материалдар сарапшыларға берілді. Олардың қорытындысынан кейін монеталарды елден шығармақ болған адамға қатысты тиісті процестік шешім қабылданады", - делінген хабарламада.
Айта кетері, соңғы уақытта тыйым салынған тауарларды пошта арқылы контрабандалық жолмен әкелу фактілері көбейді.
Тек былтырдың өзінде Алматы қаласының әуежайында айналымға тыйым салынған тауарларды, оның ішінде есірткі және психотроптық заттарды, қару-жарақ пен оқ-дәрілерді кеден шекарасы арқылы өткізудің ондаған фактісі тіркелді.