АСТАНА, 13 желтоқсан – Sputnik. Еңбек және халықты әлеуметтік қорғау министрлігі солтүстіктен оңтүстікке қайтып келген қазақстандықтардың санын жариялады, деп хабарлайды Sputnik Қазақстан тілшісі.
Көші-қон комитеті төрағасының міндетін атқарушы Ілияс Испановтың айтуынша, биыл бағдарлама аясында оңтүстіктен солтүстікке 7 556 адам көшіп барған.
"Олардың ішінде 1 200-дей қандас, қалғаны – оңтүстіктің азаматтары, қазақстандықтар. 76 қайтып оңтүстікке кетіп қалған, ол 1 процент қана", - деді Испанов орталық коммуникациялар қызметінде өткен брифингте.
Министрлік өкілі қайтып кетудің себебін де айтты. Мәселен, 30 адамға өзі тапқан жұмысы ұнамай қалды. Сол себепті қайтадан туған жеріне көшіп кеткен.
"Сосын 33 адам бара сала, қайтып кеткен. Оларға сол жақтың климаты ұнамады", - деп атап көрсетті Испанов.
Осы орайда министрлік солтүстікке көшіп барғандарға ақша берілетінін еске салды. Ал қайтып кетсе, оны қайтару қажет. Қарыз өтелмеген жағдайда ақшаны сот арқылы өндіріп алады. Биыл оңтүстікке қайтып кеткен 40 адам қаржылай көмек алып үлгерді. Барлығы ақшаны қайтаруы тиіс.