ТАЛДЫҚОРҒАН, 12 қараша – Sputnik. Жетісу облысында көлік жүргізушісі екі жаяу жүргіншіні қағып, оқиға орнынан қашып кетті.
Жол апаты 10 қарашада болған. Жаркент қаласындағы Әлиев көшесінде белгісіз маркалы автокөлік екі ер адамды қағып өткен. Жаяу жүргіншілердің бірі оқиға орнында көз жұмды. Жүргізуші қашып кеткен, бірақ көліктің мемлекеттік нөмірі апат орнында абайсызда қалып қойыпты.
Полиция жол апатына кінәлі адамды анықтады. Ол Toyota Camry тізгіндеген Алматы облысының 31 жастағы тұрғыны болып шықты, деп хабарлады Жетісу облысы полиция департаментінің баспасөз қызметі.
"Күдікті уақытша ұстау изоляторына қамалды. Көлік тәркіленіп, арнайы тұраққа қойылды. Тергеу қылмыстық заңнаманың екі бабы – жаяу жүргіншілерді қағып кету және жол апаты болған жерден кетіп қалу бойынша жүргізіліп жатыр", - деп хабарлады ведомствоның баспасөз қызметі.
Сондай-ақ жол апатынан зардап шеккен екінші адам дәрігерлердің бақылауында екені белгілі болды.