АСТАНА, 15 қазан – Sputnik. "Самұрық-Қазына" ҰӘҚ" АҚ басқарма төрағасы Алмасадам Сатқалиев өзінің және қоластындағы қызметкерлерінің жалақысын атады, деп хабарлайды Sputnik Қазақстан тілшісі.
Айтуынша, "Самұрық-Қазына" қорында ең төменгі жалақы 250 мың теңгені құрайды. Ал орта буындағы қызметкерлер айына 650 мың теңге алса, басшылардың айлығы 850-900 мың теңге шамасында.
"Менің айлығым сәл жоғары. Бір миллион теңгеден асады. Біздің жалақымыз министрлер деңгейінде. Жоғары буындағы басшылардың еңбекақысы бір миллионнан екі миллион теңгеге дейінгі аралықта. Менікі соның ортасы", - деп Сатқалиев Ақордада кулуарда журналистер сұрағына жауап берді.
Осы орайда ол "Самұрық-Қазына" менеджерлері миллиондаған бонус алады деген пікірмен келіспейтінін атап өтті.
"Жыл қорытындысы бойынша тиімділік коэффициентіне сәйкес бүкіл компания сыйақы алу мүмкіндігіне ие болады. Бұл қызметкерлер үшін тоқсан сайынғы төлемге негізделсе, ал басқарушылар үшін жылдық негізде. Сонымен қатар біз өндірістік персоналдың жалақысын көтеру бойынша жұмыс жүргіздік", - деді басқарма төрағасы.
Сондай-ақ Сатқалиев "Самұрық-Қазынаның" орталық кеңсесінде ресейлік қызметкерлер жоқ екенін мәлімдеді.
"Орталық кеңсеге Украина мен Ресейден қызметкерлер қабылданған жоқ. Бірақ соңғы уақытта Ресейден бізге өте көп қызықты ұсыныс түсіп жатыр. Бұл айтарлықтай жоғары деңгейдегі мамандар. Бұл жерде мәселені құқықтық алаңда қарастыру керек. Егер заңнама мен халықаралық міндеттемелеріміз оларды жұмысқа алуға мүмкіндік берсе, "Самұрық-Қазына" жұмысқа орналастыруға дайын", - деді ол.