АСТАНА, 11 қазан – Sputnik. Ұлттық қауіпсіздік комитеті криптовалютаны қолма-қол ақшаға айырбастау алаңын анықтады. Есірткі сатқан қылмыстық топтар оны тапқан табысын жылыстату үшін пайдаланған, деп хабарлайды Sputnik Қазақстан.
Арнайы операция биыл қаңтар айында басталды. Сол кезде Қазақстан, Өзбекстан мен Ресейдің есірткі нарығын психотроптық заттармен қамтамасыз еткен жасырын есірткі зертханасы жойылған болатын. Заңсыз айналымнан есірткінің рекордтық партиясы – 188 келі "мефедрон" шығарылды.
Осыдан кейін арнайы қызмет мамандары қылмыстық капиталды Қазақстаннан шығару мен оны жылыстату схемаларын зерделеуге кірісті. Ақша аударымдарын анықтау қиын болды. Себебі барлығы криптовалютамен аударылып отырған.
"Ұлттық қауіпсіздік комитеті қылмыстық тізбектің барлық қатысушыларын анықтады. Биткойндарды қолма-қол ақша аударатын криптоақша айырбастау орнын да тапты. Бұл ұйым Алматыдағы әр-түрлі ақша айырбастау орындарының қызметкерлері арқылы ақшаны қолма қол беріп отырғаны белгілі болды", - делінген ресми хабарламада.
Арнайы операция кезінде қылмыстық схеманың ұйымдастырушы мен оның сыбайластары ұсталды. Қылмыстық топтардың есірткі іс-әрекетінен тапқан 68 млн. теңгесі тәркіленді.