АСТАНА, 27 қыркүйек – Sputnik. Астана полицейлері 40 миллион теңге бопсалады деген күдікпен екі адамды ұстады, деп хабарлады Polisia.kz.
Елорда полиция департаментіне 31 жастағы қала тұрғыны бопсалау фактісі бойынша арызданған.
Жәбірленушінің айтуынша, ЖШС-нің қаржы директоры мен еншілес компанияның атқарушы директоры интимдік видеоны таратамын деп қорқытып, одан 40 миллион теңге көлемінде ақша бопсалаған. Күдіктілер 15 миллион теңгені алып, қалған соманы бопсалауды жалғастырған.
Астана қаласы ПД ұйымдасқан қылмысқа қарсы күрес басқармасының қызметкерлері күдіктілерді ақшаны алу барысында қылмыс үстінде ұстады, олардан 2 миллион теңге көлемінде ақша тәркіленді.
Аталған факті бойынша Қазақстан Қылмыстық кодексінің 194-бабы бойынша сотқа дейінгі тергеу амалдары жүргізіліп жатыр.