НҰР-СҰЛТАН, 12 қыркүйек – Sputnik. Мемлекет басшысы Қасым-Жомарт Тоқаев Ұлыбритания және Солтүстік Ирландия Біріккен Корольдігінің Королі ІІІ Чарльзге таққа отыруына байланысты құттықтау жеделхатын жолдады.
"Қазақстан Ұлыбританиямен берік достық байланыстарға, қарқынды саяси диалогқа, өзара тиімді сауда-экономикалық байланыстарға негізделген берік стратегиялық серіктестікті жоғары бағалайды", - деп жазылған жеделхатта.
Президент түрлі саладағы, оның ішінде халықаралық аренадағы жан-жақты ынтымақтастық одан әрі нығая беретініне сенім білдірді.
Құттықтау соңында ол Корольге барлық игі бастамаларына толағай табыс, ал король отбасы мүшелері мен барлық британдықтарға бақыт пен өркендеу тіледі.
Патшайым Елизавета II қайтыс болғаннан кейін ханзада Чарльз III тәжді иеленді. Мұрагерлік кеңесте ол Ұлыбританияның королі болып жарияланды.