НҰР-СҰЛТАН, 21 шілде – Sputnik. Қазақстанның жеңіл атлетика тарихында алғаш рет әлем чемпионатының алтын медалін жеңіп алған Нора Джерутов журналистерге сұхбат берді, деп хабарлайды Sputnik Қазақстан Worldathletics басылымына сілтеме жасап.
Спортшы Африка құрлығынан келген жеңіл атлеттерден қауіптенген. Себебі олардың барлығы тез жүгіреді.
"Мен жарыс алдында Эфиопиядан келген әріптестерімнен қауіптендім. Олар да мен сияқты чемпион, сол себепті қауіп болды. Жеңіске жету үшін бар күшімді салдым, оңай болған жоқ", – дейді Джеруто.
Әлем чемпионы ата-анасына, бапкері мен менеджеріне алғыс айтты. Сондай-ақ, жарысқа қатысқан апасы Дэйзиге де ерекше ризашылығын білдірді.
"Ол осы қашықтықта финалға шыға алмады. Оған айтарым, келесі жолы чемпион боласың", – деді Джеруто.
Айта кетері, 26 жастағы Нора Джеруто жеңіл атлетикадан әлем чемпионатында кедергілермен 3 мың метр қашықтыққа жүгіруден алтын медальге ие болды. Осы межені 8:53.02 уақытта жүгіріп өтті. Сөйтіп, рекорд орнатты.
Осы маусымда Нора Джеруто АҚШ-та Diamond League-тің кезеңінде жеңіске жеткен еді. Жеңіл атлетикадан әлем чемпионаты АҚШ-тың Орегон қаласында өтіп жатыр. Чемпионат 24 шілдеге дейін жалғасады.
Джеруто Қазақстан азаматтығын 2018 жылы алған болатын.