АЛМАТЫ, 8 маусым – Sputnik. Ақтауда жылу желілерін жөндеу кезінде кірпіш дуал (қоршау) жұмысшының үстіне құлады, деп хабарлады Lada.kz сайты.
"8 маусым күні сағат 11:05-те 23-шағын ауданда жылу желілеріне жөндеу жұмыстарын жүргізу кезінде кірпіш дуал опырылып құлап, "Каспий жылу, су арнасы" мемлекеттік коммуналдық кәсіпорнының 1978 жылы туған қызметкерін басып қалған", – делінген Маңғыстау облыстық ТЖД хабарламасында.
ТЖД мәліметінше, оқиға орнына 17 құтқарушы мен 4 техника келді. Олар зардап шеккен ер адамды үйінді астынан шығарып, жедел жәрдем қызметкерлеріне табыстаған.
Маңғыстау облыстық көпсалалы ауруханасы ер адамның жансақтау бөлімінде көз жұмғанын хабарлады.