НҰР-СҰЛТАН, 29 сәуір - Sputnik. Елордада ұрыс жағдайына барынша жақындатылып, лаңкестік актілерге қарсы оқу-жаттығу өтеді. Бұл туралы астаналық Терроризмге қарсы шұғыл штабы хабарлады.
Оқу-жаттығу 29 сәуір сағат 08.00-14.00 аралығында "Қазақстан темір жолы" техникалық жолаушылар паркінің аумағында (Шу көшесінің аяқталған тұсы, Әл-Фараби – Қошқарбаев көшелерінің қиылысы) өтеді.
Іс-шара мақсаты шұғыл штаб күштері мен құралдарының террористік әрекеттерге дереу жауап қайтару бойынша дайындығын тексеру. Оқу-жаттығу түрлі күрделі элементтерді қамти отырып, ұрыс жағдайына барынша жақындатылған. Техникалық жолаушылар паркінің маңайында шектеу шаралары қарастырылған.
"Азаматтардан өткізіліп жатқан іс-шараларға түсіністікпен қарауға, қауіпсіздік шараларын сақтауға және жұмылдырылған мемлекеттік органдар қызметкерлерінің заңды талаптарын орындауға шақырамыз", - делінген терроризмге қарсы шұғыл штаб хабарламасында.