ПЕТРОПАВЛ, 21 наурыз – Sputnik. Петропавлда түтін мұржасы құлаған екінші жылу электр орталығының қараушы-машинисін іздеу жалғасып жатыр, деп хабарлады Солтүстік Қазақстан облысы прокуратурасының баспасөз қызметі.
"Төтенше жағдай органдары қоқыс астында қалған машинист-қараушыны құтқару-іздестіру шараларын жүргізіп жатыр", - деп хабарлады прокуратура.
Әлеуметтік желілерде қараушы-машинистің әйел екенін жазып жатыр.
"Петропавл қаласының тұрғындарына қолданыстағы қазандық агрегаттары істен шықпағанын хабарлаймыз. Сонымен қатар тұтынушыларға жылу энергиясын үздіксіз беру үшін резервтік қазандық агрегаттары іске қосылды. Жылу энергиясын беру штаттық режимде жүзеге асырылады", - деп атап өтті қадағалау органының баспасөз қызметі.
Алайда азаматтардың пәтерінде батареяларда жылу жоқ.
Сонымен қатар прокуратура азаматтарды Қазақстан Республикасы Қылмыстық кодексінің 274-бабына сәйкес көрінеу жалған ақпарат таратқаны үшін жауапкершілік қарастырылғанын еске салып, "жалған ақпарат тарату фактілерінің жиілеп кетуіне байланысты" ресми дереккөздерге ғана сенуге шақырды.
Айта кетері, 20 наурызда Петропавлда екінші жылу электр орталығының мұржасы құлады.
Содан кейін мемлекет басшысы Қасым-Жомарт Тоқаев Петропавлдағы жылу электр орталығындағы апаттан кейін облыс орталығы мен басқа да елді мекендердің тұрғындарын тез арада жылумен қамтамасыз етуді тапсырды.