НҰР-СҰЛТАН, 18 наурыз — Sputnik. Бүгінгі күні Қазақстанда мұнай экспортына қатысты қындық туындап отырған жоқ. Бұл туралы энергетика министрі Болат Ақшолақов мәлімдеді.
Қазақстанның мұнайды экспорттау және ішкі нарыққа жеткізуге арналған тасымалдау жүйесі әртараптандырылған.
Мұнайды экспорттау жұмыстары келесі бағыттар бойынша жүзеге асырылады:
Каспий құбыр консорциумының мұнай құбыры;
Атырау – Самара мұнай құбыры;
Атасу – Алашаңқай мұнай құбыры;
Ақтау теңіз порты;
теміржол арқылы.
"Бүгінгі күні мұнай экспорты бойынша шектеу жоқ", - деді Ақшолақов энергетика министрлігінің кеңейтілген алқа отырысында.
Ол Ақтөбе және Құмкөл кен орындарында мұнай өндіру көлемі төмендегені туралы мәлімдеді.
"Мұнай-газ кешенінің тұрақты жұмысын қамтамасыз ету, ішкі нарықтың мұнай өнімдеріне сұранысын қанағаттандыру және мұнайды тасымалдаудың экспорттық бағыттарын одан әрі әртараптандыру үшін вице-министр Мағауовқа "ҚазМұнайГаз" және "ҚазТрансОйл" компанияларымен бірлесіп, Кеңқияқ-Атырау мұнай құбырын жылына 12 миллион тоннаға дейін кеңейту жобасын әзірлеуге кірісуді тапсырамын", - деді министрлік басшысы.
Еске сала кетейік, наурыздың басында БАҚ-та Ресейге қарсы санкциялар қазақстандық мұнай экспорттаушыларға кері әсерін тигізіп жатқаны туралы ақпарат тарады. Атап айтқанда, анонимді трейдерлердің Reuters агенттігіне берген мәліметі бойынша, Каспий құбыр консорциумы (КҚК) Ресейге қарсы санкциялар аясында мұнай тасымалдау кезінде қиындықтарға тап болған.
Трейдерлердің айтуынша, сатып алушылар ресейлік мұнаймен араласқан және ресейлік порттан тиелген мұнайды сатып алудан бас тартқан. Алайда Қазақстанның энергетика министрлігі бұл ақпаратты жоққа шығарды.