АЛМАТЫ, 16 наурыз – Sputnik. Екібастұзда мектепте соққыға жығылған жасөспірім ауруханаға түсті. Бұл туралы баланың анасы әлеуметтік желідегі жергілікті парақшаға хабарлаған.
Ол ұлын 6-шы мектеп-лицейдің аумағында аяусыз ұрғанын айтты.
"Бас сүйек-миға зақым келген, миы шайқалған, мұрны сынған, жеңіл түрде тоңып қалған. Ол бірден есінен танған, аузынан көбік ағып... шок алған, оны футбол алаңында соққыға жыққан, ересектерден жанында ешкім болмаған! Ол жерде камера да жоқ", - деп жазды әйел.
Оның айтуынша, ұлы 9 наурызда ауруханадан шығарылды, бірақ мектеп қазірге дейін үнсіз отыр. Сондай-ақ мектеп басшылығы анасының полицияға жүгінгеніне наразылық танытқан. Ал ұлын соққыға жыққан бала мектепке барып жүр, оны тек есепке алған.
Облыстық полиция департаментінің хабарлауынша, бұл факт полиция басқармасында тіркелді.
Қазір зардап шеккен бала ем алып жатыр, содан кейін ғана сот-медициналық сараптама тағайындалады, оның нәтижесі бойынша процессуалдық шешім қабылданады.
"6-шы мектеп-лицейдің аумағында оқушылардың төбелес фактісі бойынша қазір алдын алу кеңесі өткізіліп жатыр. Қызметтік тергеу нәтижесі бойынша мектеп басшылығы мен педагогтардың іс-әрекеттеріне баға беріледі", - деп хабарлады Екібастұз қаласының білім бөлімі.