НҰР-СҰЛТАН, 10 наурыз – Sputnik. Еңбек және халықты әлеуметтік қорғау министрлігі басқа өңірден келген жұмысшы жастарға баспана жалдау үшін көтерме жәрдемақы төлеуді көздеп отыр, деп хабарлайды Sputnik Қазақстан тілшісі.
Еңбек министрлігі Халықтың табысын арттыру жөніндегі бағдарламада жаңа жұмыс орындарын құруға баса көңіл бөлген.
"Еңбек нарығында 300 мыңға тарта жұмыссыз және NEET санатындағы жастар, 80 мыңнан астам көпбалалы және мүгедіктігі бар бала тәрбиелеп отырған тұрмысы төмен отбасылар бар. Оларды жұмысқа орналастыру үшін арнайы тәсілдер мен құралдар қажет", - деді Шәпкенов үкімет отырысында.
Біріншіден, ақпараттық жүйелерді сараптау нәтижесінде әлеуметтік қолдау мен жұмысқа мұқтаж азаматтарды "Ерте анықтау жүйесі" енгізіледі. Осы орайда Цифрлық карта арқылы әлеуметтік статусы жоқ, қолдауға мұқтаж азаматтардың портреті әзірленіп, олардың нақты қажеттіліктері анықталады.
Екіншіден, NEET жастар үшін "Алғашқы жұмыс орны", түлектер үшін "Жастар практикасы", "Ұрпақтар келісімшарты" жобалары аясында субсидиялаудың ұзақтығы мен мөлшері ұлғайтылды.
Үшіншіден, жастарды жұмысқа баулу және ынталандыру үшін заңнамаға "жас жұмысшы" ұғымы енгізіліп, олар үшін сынақ мерзімі алынып тасталады. Ал басқа өңірден келген жастарға тұрғын үй жалдау үшін көтерме жәрдемақы енгізу бойынша шаралар қабылданады.
Төртіншіден, көпбалалы отбасылар мен мүгедек баласы бар отбасылар үшін барлық өңірде Әйелдерді қолдау орталықтары құрылады. Бұл орталықтарда жыл сайын 20 мыңға жуық әйелге кешенді қолдау көрсетілмек.
Министрдің айтуынша, бұл шаралар әлеуметтік қолдауға мұқтаж азаматтарды нақты қажеттіліктері бойынша анықтауға, жастарды жұмыспен қамтуға, балалы отбасыларға көмек көрсетуге мүмкіндік береді.