Польшаның Катовице қаласынан шыққан ұшақ сағат 22.32-де Алматы әуежайына қонды. Бортта 175 жолаушы болды, оның ішінде алты бала бар.
Украинадан эвакуацияланған қазақстандықтарды Алматы әуежайында олардың туыстары мен достары, сондай-ақ журналистер қарсы алды. Жолаушылар эвакуациялау жақсы ұйымдастырылғанын айтты.
Олардың сөзінше, жолдың ұзаққа созылуына Польша шекарасындағы ұзынсонар кезек себеп болған.
Қазақстанға оралғандардың бірі – Жансерік Сейітмұратов. Ол жұмыс бабы бойынша 21 ақпанда Украинаға барған.
"21 ақпанда семинарға қатысу үшін ұшқанмын. Киевтен шамамен 250 шақырым жердегі Умань деген қалада болдық. Әрине, аздап қорқыныш болды. Польшаға өзіміздің консул арқылы жеттік. Жолға 25 ақпанда шыққанбыз, қазірге дейін жол жүріп келдік", - дейді ол.
Қазақстан сыртқы істер министрлігінің өкілі Украинадағы елшілік тәулік бойы жұмыс істеп жатқанын айтып өтті.
"Украина, Польшадағы әріптестеріміз тәулік бойы жұмыс істеп жатыр. Украинаның төрт қаласындағы консулдықтарды қосқанда барлық қажетті көмек көрсетіледі", – деді Қазақстанның Алматыдағы СІМ өкілдігі басшысының орынбасары Руслан Қарабұлов.
Ал Алматы әкімдігі эвакуацияланған қазақстандықтарды қонақ үйге орналастырды. Алматыға келгендердің барлығына уақтылы әрі жан-жақты қолдау көрсетіледі. Қала әкімдігі қажет болған жағдайда медициналық мамандардың қызметін, оның ішінде психологиялық көмек көрсетуге дайын.
Ал Air Astana әуе компаниясының президенті Питер Фостер елге қайтуға ниет білдірген барлық қазақстандықты алып келгенше репатриациялық рейстер жалғаса беретінін айтты.
Айта кетері, ол Украинадан қазақстандықтарды эвакуациялауды ұйымдастыруға көмектесті және олармен бірге ұшып келді.
Репатриациялық рейстерді Қазақстанның сыртқы істер министрлігімен бірге индустрия және инфрақұрылымдық даму министрлігі, Қазақстанның Украина мен Польшадағы елшілігі, сондай-ақ Air Astana әуе компаниясы ұйымдастырады.