НҰР-СҰЛТАН, 28 ақпан – Sputnik. Қазақстанда "Құрсақтағы нәрестені қорғау" республикалық орталығын ашу жоспарланып отыр, деп хабарлайды Sputnik Қазақстан тілшісі.
"Ұрықтың туа біткен ақауларын ерте анықтау үшін ерте пренаталдық скринингтің жаңа заманауи әдіснамасына көшу қажет. Сонымен қатар, пренаталдық ультрадыбыстық диагностика қызметін жетілдіру керек", - деді денсаулық сақтау министрі Ажар Ғиният министрліктің алқа отырысында.
Осыған байланысты республикалық "Құрсақтағы нәрестені қорғау орталығын" құру жоспарланып отыр. Ал облыстық перинаталдық орталықтарда оның бөлімшелері ашылады.
Сондай-ақ, министрдің айтуынша, биыл 8 оңалту орталығын ашу жоспарланған, бұл балаларды оңалтумен қамту деңгейін арттырады.
Бұдан бөлек, министрлік шала туған нәрестелерге көмек көрсету сапасын арттыруды, балалардағы патологияны ерте анықтау жұмысын күшейтуді көздеп отыр. Бұл міндеттерді шешу үшін шалғай аудандарда 20 ауданаралық ауруханада перинаталды көмектің үшінші деңгейдегі босандыру бөлімшелері ұйымдастырылады.
Сонымен қатар, 17 ерте араласу орталықтарын құру, кейіннен катамнестикалық бақылауды қамтамасыз ете отырып, шала туған нәрестелерге медициналық көмек көрсетуді жетілдіру көзделген.