НҰР-СҰЛТАН, 22 ақпан — Sputnik. Алматының орталығында қару-жарақ сақталған орын табылды, деп хабарлайды Polisia.kz.
Жедел арналар арқылы келіп түскен ақпаратты Алматы қаласы бойынша Ұлттық қауіпсіздік комитеті департаменті және Бостандық аудандық полиция басқармасының қызметкерлері тексерген.
"Барлығы 4 атыс қаруы табылды. Атап айтқанда, “Beretta Xtreme”, “Tikka T3x”, “Gamo FS 10x igt”, “S ako TRG”. Тәркіленген қару жайлы ақпаратты сот-баллистикалық сараптама арқылы анықталады", - делінген хабарламада.
Сондай-ақ, бұл қарулардың қылмыстарға қатысының бар-жоғы сараптамалық зерттеу нәтижесінде белгілі болады.
Осыдан бір апта бұрын полицейлер "Медеуге" барар жолда орман белдеуінде қару-жарақ пен гранаталар сақталған орынды тапқан болатын.
Тәртіп сақшылары қарулар сақталған орындар туралы ақпаратты қаңтарда Алматыда болған жаппай тәртіпсіздікке қатысқандардан білді.