АЛМАТЫ, 18 қаңтар – Sputnik. Алматыда терроризмге қарсы операция басталғалы лаңкестік, тонау және басқа да қылмысқа қатысы бар 2 748 адам ұсталды, деп хабарлады қала комендатурасы.
"Терроризмге қарсы операция басталғалы лаңкестік, тонау және басқа да қылмысқа қатысы бар 2 748 адам ұсталды. 131 бірлік атыс қаруы мен 4 179 оқ-дәрі тәркіленді", - делінген хабарламада.
17 қаңтарда "102" пультіне 437 хабарлама келді, комендатураның call орталығына азаматтардан жедел әрекет етуді талап ететін 41 дабыл түсті.
Айта кетері, Алматыдағы тәртіпсіздіктерден кейінгі шығын 112 миллиард теңгеден асады деп есептеліп отыр. Бүлік кезінде мыңнан аса адам медициналық көмекке жүгінген, оның ішінде қазір 110 адам ауруханада жатыр.
Бүлікшілер 1 600-ден астам сауда нысанын тонап, 356 көлікке зақым келтірген.
Қалада күш құрылымдарының 1 097 қызметкері зардап шекті. Медициналық мекемеде 5 адам жатыр, ішінде екеуі ауыр хәлде. 9 қызметкер қаза тапты.