АЛМАТЫ, 3 қаңтар — Sputnik. Энергетика министрі Мағзұм Мырзағалиев газ бағасын көтеру кезінде халықпен түсіндіру жұмысын жүргізуде олқылықтар болғанын мойындады.
"Халықпен түсіндіру жұмысында кемшіліктер болды", - деді брифингте журналистің сұрағына жауап берген министр.
Мырзағалиев Энергетика министрлігінің басшысы қызметін шамамен үш ай атқарса да, болып жатқан жағдай үшін өзінің жауапкершілігін сезінетінін мойындады.
"Бұл жолы мен Жаңаөзенде болмадым. Кеше мен бірден вице-министрді жібердім, ол сол жерде кездесіп, зауытпен, желі иелерімен және т.б. жұмыс істеді. Мен өз жауапкершілігімді сезінемін, өзім басқаратын сала үшін жауапкершілікті сезінбесем, қалай министр бола аламын. Энергетика министрлігін үш айға жуық басқарсам да, мен өз жауапкершілігімді түсінемін", - деді ол.
Сондай-ақ, министр бағаны 85-90 теңгеге дейін төмендету – бұл үкімет шешімі емес, бизнесмендердің бастамасы екенін атап өтті.
"Бизнес өзінің әлеуметтік жауапкершілігін түсінеді. Тиісті бастаманы кәсіпкерлер көтерді. Біз бизнес есебінен өртті сөндіріп отырған жоқпыз. Бұл олардың жеке бастамасы", - деп түйіндеді энергетика министрі.
Бұған дейін Мырзағалиев ведомство өкілдері митингіге қатысушылармен неге кеш кездескенін түсіндірді.
Бір тәулік бойы тұрғындар талабына жауап ретінде ведомствоның ұстанымы пысықталған.