НҰР-СҰЛТАН, 27 желтоқсан – Sputnik. АҚШ-та аса ауыр салмақтағы кәсіби боксшы кіші Дэнни Келлиді көшеде атып тастады. 30 жастағы спортшы джиппен бағдаршамда тоқтағанда белгісіз біреулер оқ жаудырған. Салонда Келлидің әйелі мен үш баласы да болды, деп хабарлайды Vringe.com порталына сілтеме жасап.
Полицияның мәліметіне сәйкес, трагедия 25 желтоқсанда сағат 16:40-та Мэрлиленд штатындағы Темпл-Хиллз қалашығында адам көп жүретін Сент-Барнабас-роуда болған. Боксшының жол талғамайтын көлігінің жанына басқа көлік тоқтаған. Соның жүргізушісі рөлде отырған боксшыны атып тастаған.
Оқиға орнына барған жедел жәрдем қызметкерлері спортшыны құтқара алмады. Ол ауыр жарақат алып, көз жұмды. Әйелі мен үш баласы зардап шеккен жоқ.
Қазіргі кезде полиция қылмыскерді іздестіріп жатыр. Оны табуға көмектескен адамға 25 мың доллар сыйақы тағайындалып отыр.
Детективтер қылмыстың мән-жайын анықтауға кірісті. Оған екі жүргізуші арасындағы жанжал немесе басқа да себеп түрткі болуы мүмкін.
"Бұл Келлидің отбасы мен достары үшін орны толмас қаза. Ол өз жақындарымен Рождествоны қарсы ала алмады. Олар мейрамды атап өтудің орнына қайғыдан қан жұтып отыр", - деді жергілікті полицияның аса ауыр қылмыстар жөніндегі офицері Дэвид Блейзер.
Айта кетері, Дэнни Келли соңғы жекпе-жекте Ник Киснермен жұдырықтасып, 2-ші раунда нокаутпен жеңді.