НҰР-СҰЛТАН, 20 желтоқсан – Sputnik. Мемлекет басшысының жарлығымен Алексей Цой Қазақстанның денсаулық сақтау министрі лауазымынан босатылды, деп хабарлады Ақорданың баспасөз қызметі.
Алексей Цой 2020 жылдың 25 маусымында қазір тергеліп жатқан Елжан Біртановтың орнына денсаулық сақтау министрі болып тағайындалды.
Алексей Цойдың өмірбаяны
Алексей Цой 1977 жылы 2 сәуірде Оңтүстік Қазақстан облысында дүниеге келген.
Sells College (Лондон), Қазақстан мемлекеттік медицина академиясының аспирантурасын, Оңтүстік Қазақстан мемлекеттік медицина академиясын, "Дәнекер" халықаралық құқық және халықаралық бизнес институтын, РФ президенті жанындағы Ресей халық шаруашылығы және мемлекеттік қызмет академиясының корпоративтік басқару жоғары мектебін тәмамдаған.
Стэнфорд университетінде (АҚШ), Сингапурда, Мәскеуде, Германияда, Ұлыбританияда және тағы басқа елдерде тағылымдамадан өткен.
Іскерлік әкімшілік докторы, медицина ғылымдарының кандидаты.
Хирург-эндоскопист болып жұмыс істеген, Қалпына келтіру хирургиясы және трансплантология орталығының аға ғылыми қызметкері, Ұлттық ғылыми медицина орталығының ішкі медицина орталығының жетекші ғылыми қызметкері болған.
"Еуроазиаттық респираторлық қоғам" қоғамдық бірлестігінің бас хатшысы, Қазақстан президенті іс басқармасының заманауи медициналық технологияларды енгізу орталығының директоры, Қазақстан президенті іс басқармасының медициналық орталығының басшысы, Астана қаласының №1 қалалық ауруханасының бас дәрігері, денсаулық сақтау және әлеуметтік даму вице-министрі, денсаулық сақтау вице-министрі қызметтерін атқарған.
Цой 2019 жылдың ақпанынан бастап министр болып тағайындалғанға дейін Қазақстан президенті іс басқармасының медицина орталығын басқарды.