НҰР-СҰЛТАН, 12 тамыз – Sputnik. Ауыл шаруашылығы министрінің міндетін атқарушы Ербол Қарашөкеев бұрынғы министр Сапархан Омаровтың "Азық-түлік келісім шарт корпорациясының" басқарма төрағасы болып тағайындалуына қатысты пікір білдірді.
Осы жылдың шілдесінде мемлекет басшысы ауыл шаруашылығы министрлігінің жұмысын сынға алып, министр Омаровты отставкаға жіберді.
Біраз уақыттан кейін бұрынғы ауыл шаруашылығы министрі Сапархан Омаров "Азық-түлік келісім шарт корпорациясы" ұлттық компаниясына басшылыққа келді.
Оқи отырыңыз: Экс-министр Сапархан Омаров жаңа қызметке кірісті
Бұл шешім қазақстандықтар арасында көптеген сұрақ туғызды. Неліктен өз міндетін атқара алмаған шенеунік жоғары лауазымды қызметке тағайындалады?
"Сапархан Кесікбайұлы Омаров менің бұйрығыммен "Азық-түлік келісім шарт корпорациясының" басқарма төрағасы болып тағайындалды. Оның бай тәжірибесі бар, екі жыл министр, аграрлық комитеттің төрағасы болды, оған дейін депутат, ауыл шаруашылығы вице-министрі болып жұмыс істеді. Сондықтан осы қиын кезеңде оның жинақтаған тәжірибесі қажет және біз оны қазіргі қызметінде пайдаға жаратамыз деп ойлаймын", - деп жауап берді Қарашөкеев.
Оның айтуынша, Сапархан Омаров президенттің сынын ескерген, сондықтан әрі қарай тиімді әрі жақсырақ жұмыс істейді.