Музей екі қабаттан тұрады. Бірінші қабатта қоғам қайраткерінің өмірбаяны көрсетілген. Бұл ғимарат бір кездері композиторлар үйі болған, ал екінші қабатында композитор Латиф Хамидидің төрт бөлмелі пәтері орналасқан.
Дінмұхамед Ахметұлы Қонаев 1912 жылы Алматы қаласында туған. Қарапайым, шаруа отбасында дүниеге келген. Әкесі Меңліахмет Қонаев пен анасы Зәуре Шымболатова екеуі 70 жыл қиындықта да, қуанышта да бірге болған. Анасы 11 бала дүниеге әкелген, ал Дінмұхамед Ахметұлы отбасында үшінші бала, ұлдың ішінде тұңғышы.
1931-36 жылдар аралығында Дінмұхамед Ахметұлы Мәскеудегі түсті металл институтында білім алды. Оқуды тәмамдаған соң Балқаш мыс қорыту комбинатына бұрғылау станогының машинисі болып жұмысқа орналасады.
Дінмұхамед Қонаев 1937 жылы болашақ жары, татар қызы Зухра Шәріпқызын кездестіреді. Екеуі 1939 жылы шаңырақ көтерген.
Ол соғыс жылдарында үкімет басында қызмет етті. 1942-1952 жылы Қазақ КСР министрлер кеңесінің төрағасының орынбасары қызметін атқарды. 1952 жылы Қонаев Қазақ КСР Ғылым академиясының президенті болып сайланды.
1955 жылы Қазақ КСР жоғары кеңесінің төрағасы болды. Бұл қызметті бес жыл атқарды. Бес жылдан кейін Қазақстан компартиясы орталық комитетінің бірінші хатшысы қызметіне келді. 1960-1986 жылдары осы қызметті атқарды.
Оқи отырыңыз: Әйгілі жазушы Сәбит Мұқанов өмірінің соңында қайда тұрды – фото
Алматыдағы мұражай екі нысаннан тұрады. Бірі – Дінмұхамед Ахметұлы Қонаев тұрған үй. Ол Қонаевтың мемориалды пәтері деп аталады. Осыдан 9 жыл бұрын, 2012 жылдың 12 қаңтарында мемлекет қайраткерінің 100 жылдық мерейтойына байланысты ашылған. Қонаев мұнда 1969-1993 жыл аралығында тұрған.
Дінмұхамед Қонаевтың артында ұрпақ қалмады. Алайда інісі Асқардың баласы Диар мұрагері саналады. 1990 жылы Дінмұхамед Ахметұлының жары Зухра Шәріпқызы дүниеден өтті. Сол кезде Димекең үйде жалғыз қалмасын деген оймен Диар Асқарұлы Қонаев жұбайы, ұлы Димашпен бірге қазіргі Төлебаев көшесінде орналасқан үйге көшіп барған.
1993 жылы 81 жасында Дінмұхамед Қонаев дүниеден өтті. Диар Асқарұлы 2012 жылы үйді үкіметке өткізді.
Музей қазір Алматы қаласы мәдениет басқармасы "Алматы қаласы музейлер бірлестігі" құрамына кіреді.
Екі мұражайға кіру құны ересектер үшін – 800 теңге, студенттерге – 300 теңге, оқушыларға – 200 теңге, зейнеткерлер үшін 100 теңге.