НҰР-СҰЛТАН, 16 наурыз – Sputnik. Қазақ боксшысы Садриддин Ахмедов пен әнші Ақбота Құрманғали сәбилі болды. Бұл туралы "Eye of the Tiger Management" промоутерлік компаниясы хабарлады.
"Біз S.O.Q. туралы екі тамаша жаңалығымыз бар! Садриддин мен оның жұбайын сәбилі болуымен құттықтаймыз! Бұдан бөлек, Садриддиннің Квебекті жақсы көретіні сонша, ол Eye of the Tiger Management-пен арадағы келісімшартты ұзартты! Біз осы еңбекқор, талапты және талантты жас жігітпен әріптестік орнатқанымызды мақтан тұтамыз", - деп жазды компания Facebook парақшасында.
Айта кетейік, 2019 жылдың қыркүйек айында боксшы Садриддин Ахмедов KeshYou тобының бұрынғы солисі Ақбота Құрманғалиге үйленді. Той Нұр-Сұлтан қаласында өткен.
Садриддин Ахмедов кәсіпқой боксқа 2018 жылдың сәуірінде келген болатын. Содан бері 12 жекпе-жек өткізді. Барлығында жеңіске жетті. Соңғысы Мексикада ұйымдастырылды. Осы жекпе-жекте Ахмедов Нидерланды өкілі Стивен Даньодан (17-4-3, 6 КО) басым түсіп, бірден бірінші орта салмақтағы үш белбеу – WBA Continental, NABF және WBC Francophone-ны жеңіп алды.