НҰР-СҰЛТАН, 28 қаңтар – Sputnik. Қасым-Жомарт Тоқаев сыбайлас жемқорлыққа қарсы іс-қимыл агенттігінің төрағасы Алик Шпекбаевты қабылдады, деп хабарлайды Ақорда.
Президентке агенттіктің өткен жылы атқарған жұмысының негізгі нәтижелері жайында баяндалды.
Алик Шпекбаев мемлекет басшысына сыбайлас жемқорлыққа қарсы бастамалардың іске асырылуы туралы және еліміздің Transparency International сыбайлас жемқорлықты қабылдау индексі бойынша ілгерілегені жөнінде баяндады.
Агенттік төрағасының айтуынша, жүйелі жүргізіліп жатқан саяси жаңғыру мен сыбайлас жемқорлыққа қарсы реформалардың арқасында Қазақстан аталған рейтингте алғаш рет 38 балл жинаған. Бұл еліміздің 19 сатыға жоғары көтеріліп, 94-ші орынға табан тіреуіне мүмкіндік берген.
"Қасым-Жомарт Тоқаев агенттіктің шығындарды өтеу және тиімсіз жұмсалған қаржының алдын алу бойынша атқарған жұмысының нәтижесінде 95,6 миллиард теңгенің кері қайтарылғанын, оның экономикалық тиімділігін оң бағалады. Сондай-ақ сыбайлас жемқорлық қылмыстарының 5 процентке төмендегенін атап өтті", – делінген хабарламада.
Мемлекет басшысы сыбайлас жемқорлыққа қарсы жаңа заңнамалық бастамаларды сапалы түрде жүзеге асыруға және ЭЫДҰ мен ГРЕКО стандарттарына сәйкес салалық заңнаманы жаңғыртуды жалғастыруға, оның ішінде, шенеуніктердің шығыстары мен кірістері бір-біріне сәйкес келмегені үшін жауапкершілік енгізу мәселесіне назар аударды.
Оқи отырыңыз: Мектеп оқулығын оқыған президент неге таңғалды
Кездесу соңында президент агенттік төрағасына жазаны бұлтартпай орындау қағидатын қатаң сақтаудың маңызды екенін айтып, қылмыстың алдын алу ісінде азаматтық қоғаммен байыпты жұмыс жүргізуді тапсырды.