НҰР-СҰЛТАН, 24 қараша – Sputnik. Димаш Құдайберген Токиодағы Азия-Тынық мұхиты әндер фестиваліне құрметті қонақ ретінде шақырылды. Жобаны сол өңірдің "Евровидениесі" деп атайды.
Әнші тыңдармандардың сүйікті әніне айналған Sos d'un terrien en détresse композициясын орындады.
"Құрметті достар, мен сіздердің алдарыңызда тұрғаныма өте қуаныштымын. Жапония керемет. Мен қонақжайлық пен қаланың сұлулығы әрі тазалығына тәнті болдым", - деді қазақстандық жұлдыз.
Димаш тыңдармандарына Қазақстан туралы айтып берді. Ол еліміздің сан ғасырлық тарихы бар екенін атап өтті.
Азия-Тынық мұхиты әндер фестивалі (ABU Song Festival) – аймақтың үздік әртістері өнер көрсететін халықаралық шоу. Кейде оны "Евровидениенің" баламасы деп те атайды.
Дегенмен бұл фестивальде танымал әншілер өзара бақ сынаспайды. Былтыр ABU Song Festival Түрікменстанда өткен болатын.