НҰР-СҰЛТАН, 31 мамыр — Sputnik. Қазақстанның тұңғыш президенті Назарбаев Университетінің түлектерін құттықтап, атлетика орталығының ашылу салтанатына қатысты, деп жазды Елбасының баспасөз хатшысы Айдос Үкібай өзінің Twitter парақшасында.
"Бүгін Елбасы NU түлектерін құттықтады. Бұдан соң Нұрсұлтан Назарбаев университеттегі атлетика орталығының ашылу салтанатына қатысты", - деп жазды Айдос Үкібай.
Шарада Назарбаев Университетінің президенті Шигео Катсу мен ҰҚК басшысы Кәрім Мәсімов те болған.
Назарбаев Университетінің атлетика орталығы – 660 көрерменге арналған арена мен олимпиадалық бассейні бар спорт ғимараты. 19 мың шаршы метр аумақты алып жатыр. Сондай-ақ, сквош-корт, жекпе-жек, семсерлесу, жаттығу залы, дәмхана мен кеңселері бар.
Мүмкіндігі шектеулі жандар нысанға тегін бара алады.