АСТАНА, 11 ақпан – Sputnik. АҚШ-та ұсталған 24 жастағы қазақстандық Махаббат Әбдуалиеваның ісі бойынша алғашқы сот тыңдауы наурыздың ортасына белгіленді. Бұл туралы бүгін сыртқы істер министрлігі баспасөз қызметінің жетекшісі Айбек Смадияров мәлімдеді, деп хабарлайды Sputnik Қазақстан тілшісі.
"Бірінші сот тыңдауы наурыздың ортасына белгіленіп отыр. Қазір ол бостандықта, адвокаты жұмыс істеп жатыр. Тергеу амалдары жалғасуда", - деді Смадияров апта сайынғы брифингте.
Сондай-ақ, ол былтыр Нью-Йоркте алаяқтықпен айналысты деген күдікпен ұсталған үш қазақстандыққа қатысты да тоқталды.
"Олардың үшеуі де кепілпен босатылды. Бірінші сот тыңдауы 7 ақпанда өткен болатын. Бірақ мамыр айының басына шегерілді. Себебі, біз бұған дейін хабарлағандай, тергеу амалдары жалғасып жатыр", - деді ол.
Айтуынша, аталған іске 25 адамның қатысы болуы мүмкін. Сондықтан тергеу ұзаққа созылып кетті.